Ungdomsrett
Etter fullført ungdomsskule har alle elevar rett til tre års vidaregåande opplæring. Retten må takast ut innan fem år etter at du har byrja i vidaregåande skole, men du kan likevel ikkje ha Ungdomsrett lenger enn til det kalenderåret du fyller 24 år. Dersom du sluttar etter 1.oktober i skoleåret har du brukt eitt år av den tre-årige opplæringsretten din, og eitt år av den fem-årige fristen for å ta ut retten. Du har Ungdomsrett i Hordaland dersom du har folkeregistert adresse i vårt fylke pr. 1.mars i søknadsåret, eller kan dokumentere at du skal flytte med foreldre/føresette til vårt fylke innan skolestart i august.
Ved skifte av utdanningsprogram i Vg1 eller programområde i Vg2, vil opplæringsretten din automatisk bli utvida med eitt år (omvalsrett). Den fem-årige fristen for å ta ut retten blir ikkje utvida.
Søkjarar med Ungdomsrett blir prioritert framfor alle andre søkjargrupper til vidaregåande skolar.
Dersom du på grunn av sjukdom, svangerskap/omsorg for barn, militærteneste eller andre særlege (sosiale) årsaker treng utvida rett og/eller frist for å fullføre utdanninga di, kan det søkjast om utviding av både rett og frist. Ofte blir slike søknader sendt frå skolen din eller OT/PPT, men du kan sjølvsagt også søkje om dette på eiga hand dersom du kan leggje ved naudsynt dokumentasjon. Sjå også søknad om utvida rett med inntil to år for elevar som etter Opplæringslova §3-1 og 5-1 har rett til spesialundervisning.
Vaksenrett
Alle som er 25 år eller eldre, og ikkje har fått fag-/yrkes-/studiekompetanse tidlegare, har rett til vidaregåande opplæring for å få slik kompetanse. Opplæringa for vaksne blir i stor grad gitt som tilpassa opplæring for denne elevgruppa. Det kan likevel søkjast om inntak i ordinære klassar ved dei vidaregåande skolane. Ved inntak blir denne gruppa prioritert etter søkjarar med Ungdomsrett ( sjå ovanfor). Vaksenretten er ikkje tidsavgrensa
Fullføringsrett
Dette gjeld alle som ikkje lenger har Ungdomsrett eller Vaksenrett, men som har har byrja på ei ny vidaregåande utdanning. Ved inntak blir denne gruppa prioritert etter søkjarar med Ungdomsrett og Vaksenrett, dvs. prioritet 3 i inntaket.
Søkjarar som ikkje har ein av dei tre rettane ovanfor kan bli tatt inn til ordinær vidaregåande opplæring dersom det er ledige plassar, dvs. prioritet 4 i inntaket .
Rett til vidaregåande opplæring i inntil to år ekstra
(jf. § 3-1 i Opplæringslova)
Elevar som har rett til spesialundervisning (jf. Opplæringslova § 5-1), har rett til inntil to år ekstra i vidaregåande oppplæring når eleven treng dette for å kunne nå opplæringsmåla for den einskilde (jf. § 3-1 i Opplæringslova).
Retten gjeld også for elevar som etter Opplæringslova har rett til opplæring i og på teiknspråk (etter § 3-9), for elevar som har rett til opplæring i punktskrift (etter § 3-10), samt for elevar med rett til særskild språkopplæring (etter § 3-12). For disse elevgruppene gjeld ikkje kravet om å oppfylle vilkåra for spesialundervisning.
Det er krav om sakkunnig vurdering frå OT/PPT før fylkeskommunen gjer vedtak om utvida opplæringstid.
Eleven må kontakte skolen for nærare informasjon.
Du kan finne meir informasjon om dette på vilbli.no