Statsråd Tora Aasland på besøk hos StormGeo på Nøstet i Bergen ved førre tildeling av pengar frå Regionalt forskingsfond Vestlandet. No vankar det meir støtte til verselskapet: Seniorforskar Nina Gjerde Winther (f.v.), sjefmeteorolog Martin Grønnevet, statsråd Tora Aasland, dåverande fylkesordførar Torill Selsvold Nyborg og Siri Kalvig, gründer av StormGeo. (foto: Bjarte Brask Eriksen)
Høg regional relevans
– Felles for alle prosjekta som har fått tilsegn om midlar, er gode faglege vurderingar frå Noregs forskingsråd, tema av høg regional relevans og tydeleg potensial for innovasjon og verdiskaping, seier styreleiar Tom Tvedt i Regionalt forskingsfond Vestlandet.
Viktig rolle
Tvedt meiner søknadsmengda og kvaliteten på mange av prosjekta viser at fondet er i ferd med å ta ei viktig rolle som pådrivar for forskingsdriven innovasjon i næringsliv og offentleg sektor på Vestlandet.
Styreleiar Tom Tvedt meiner Regionalt forskingsfond Vestlandet er i ferd med å ta ei viktig rolle som pådrivar for forskingsdriven innovasjon i næringsliv og offentleg sektor på Vestlandet.
32 søknader
Det hadde totalt kome 32 søknader, og 13 prosjekt i Hordaland, Rogaland og Sogn og Fjordane fekk midlar. Prosjekta var fordelte på tre tematiske hovudsatsingsområde:
Berekraftig matproduksjon, grøn eller blå sektor - 5 prosjekt - 8,1 mill
Energi/maritim sektor - 3 prosjekt - 5,5 mill
Offentlege utviklingsoppgåver - 5 prosjekt - 10,1 mill
Viktige bidrag
– Sidan forsking per definisjon inneber risiko, er det naivt å tru at alle desse prosjekta skal ende med grensesprengande resultat. Vi har likevel tru på at dei i sum skal gi viktige bidrag til innovasjon, utvikling og verdiskaping blant bedrifter og offentlege aktørar i landsdelen, seier Tvedt.
Frå omsorgsteknologi til vindkraft
Høgskolen i Bergen fekk nesten 2,2 millionar kroner til eit større forsøk med bruk av omsorgsteknologi i Lindås kommune. Tildelinga er eit ledd i satsinga fondet har for å auke interessa for forsking som utviklingsverktøy i offentleg sektor. Målet er å kartleggje erfaringane hos brukarar, pårørande og tilsette i heimetenesta. Etiske og juridiske aspekt ved bruk av omsorgsteknologi står og sentralt.
Presisjonsgjødsling
Norsk Fruktrådgiving Hardanger fekk i overkant av to millionar til å forske på presisjonsgjødsling av eple og bringebær. Målet er meir kostnadseffektiv gjødsling, jamnare avlingar, betre fruktkvalitet og betre lagringsevne. Kunnskap om effektane av gjødsling på ulike utviklingsstadium hos plantane står sentralt i prosjektet.
Offshore vindkraft
Også StormGeo har eit prosjekt som ifølgje styreleiaren kombinerer solid forskingsinnhald med innovasjonspotensial og tydeleg regional relevans. Formålet er å utvikle eit komplett vêrvarslingssystem for offshore vindkraft ved bruk av avanserte vêrmodellar og statistisk postprosessering.
Kompetanse
– Dette er eit område som har mykje å seie for Vestlandet, som ønskjer å utvikle vindkraftindustri offshore og samtidig bli ein region med monaleg kompetanse på området, seier Tvedt.
Han er også godt nøgd med at fleire av søknadene i år var baserte på forskingssamarbeid over fylkesgrensene.
– Det er akkurat slik vi ønskjer at fondet skal fungere, seier han.
Grundig vurdering
Alle søknader som oppfylte dei formelle krava, vart grundig vurderte av fagpanel oppnemnte av Noregs forskingsråd. Panela har mellom anna vurdert forskingsgrad, innovasjonsgrad, verdiskapingspotensial for partnarar og prosjektkvalitet. Deretter har Regionalt forskingsfond Vestlandet særleg vurdert regional relevans og sett prosjekta i høve til verdiskapingspotensialet for landsdelen.
Forskingskvalitet
– Men det er viktig for meg å understreke at det må liggje ein grunnleggjande forskingskvalitet i botn, elles kan vi ikkje gi eit prosjekt støtte om verdiskapingspotensialet er aldri så stort. RFF Vest er eit forskingsfond, seier Tvedt.
63 millionar kroner
Totalt var det søkt om 63 millionar kroner i forskingsmidlar, tre gonger så mykje som fondet hadde til rådvelde. Maksimalt søknadsbeløp for eitt prosjekt var ein million årleg i tre år; totalt tre millionar. Det er eit krav at søkarane finansierer minst halvparten og i nokre tilfelle to tredelar av dei totale prosjektkostnadene gjennom andre kjelder enn fondet.
For full oversikt over tildelinga, sjå heimesida til fondet: www.regionaleforskningsfond.no/vestlandet